Heb 12 | MED | STEP | Unt morung wamp minal mbᵾ ndi, tᵾn tᵾk pok etᵾk, en enim nga mondpa pili uⱡ ei, tᵾn tᵾk ora nduk, ik kai mat tᵾk rapᵾndᵾk nᵾtᵾng. Uⱡ ei nga, tᵾn nga kᵾng ei nga mbun na, uⱡ kit na mbᵾ wak ropᵾn, Got ndi, tᵾn nombuⱡa tᵾkᵾrmᵾn nimba, tᵾpa ora ndurum ila, ronduⱡ mundpᵾn, tᵾkᵾrpᵾn pᵾmin.

Hebrews 12

Got Ei Tᵾn Nga Tipam Ei

1 Unt morung wamp minal mbᵾ ndi, tᵾn tᵾk pok etᵾk, en enim nga mondpa pili uⱡ ei, tᵾn tᵾk ora nduk, ik kai mat tᵾk rapᵾndᵾk nᵾtᵾng. Uⱡ ei nga, tᵾn nga kᵾng ei nga mbun na, uⱡ kit na mbᵾ wak ropᵾn, Got ndi, tᵾn nombuⱡa tᵾkᵾrmᵾn nimba, tᵾpa ora ndurum ila, ronduⱡ mundpᵾn, tᵾkᵾrpᵾn pᵾmin. 2 Tᵾn nga mong raⱡ ndi, Jisas kun kandpᵾn kᵾn, elim puⱡ mondpa mba pora nimba, mondpa pili uⱡ ei, etpa ronduⱡ mundᵾmba. Jisas elim wote, ambuⱡpa paⱡpa, moⱡmba ei nga pilpa kᵾn, nde peta koma ropa, mindil mam mbᵾ nomba, koⱡmba ei nga, mundmong iti nᵾtᵾtᵾm. Uⱡ i itim ei nga, akup Tipam Got nga ki mbo orunga, nde pol wingti ila morum.

3 Akup enim pilik kun itᵾi! Wamp mat uⱡ kit etmin mbᵾ, Jisas kᵾn el puⱡa wamp ralk morung. Ei nga, Jisas nga itim uⱡ mbᵾ, enim akup pᵾnmin ei kᵾn, ronduⱡ mundᵾk molk, enimp kulk, mundmong etᵾk wak rui nᵾrᵾi! 4 Ei nga, enim ndi, uⱡ kit mbᵾ, el rok tᵾk, mana nduimin nᵾk etᵾng ni kᵾn, wote enim rok kundi nakᵾndrᵾng mon! 5 Enim Got ndi, ik nimba ngumba, tᵾpa rapundpa, wote tᵾpa elim nga kangambuⱡa randrᵾm uⱡ mbᵾ, tᵾk apra ndurmin nimba mel,

“Na nga kangambuⱡa mbᵾ ye! Enim Nuim ei nga ik ei, tᵾk roi ndui nᵾndᵾi! Enim nga uⱡ ⱡawa etmin mbᵾ nga, tᵾpa ora ndum ndam, enim numan orunga mbun ti nᵾtᵾi, mon! 6 Nambuⱡ emel, Nuim ei ndi, wamp mat numan ngurum mbᵾ, uⱡ kai mbᵾ itᵾi nimba, tᵾpa kun etᵾm. Nuim ei ndi, mbun ngurum wamp mbᵾ, wote rukᵾr tᵾpa, elim nga kangambuⱡa mel randrᵾm,” nᵾtᵾm.
7 Uⱡ mbun mat, enim kᵾn om ndam, ronduⱡ mundᵾk molk, mindil nok, mbun koma rᵾi! Nambuⱡ emel, Got ndi, enim tᵾpa, elim nga kangambuⱡa randrᵾm. Wote, kangambuⱡa nam ti, tipam ndi, tᵾpa kun iti natᵾtᵾm ei? 8 Kangambuⱡa mbᵾ, Got ndi, tᵾpa kun mint etᵾm. Got ndi, kangambuⱡa ti, tᵾpa kun iti natᵾtᵾm ndam, kangambuⱡa ei, Got elim nga kangambuⱡa kupa ti mon! 9 Wote, ya mᵾi kona ila, tᵾn nga tipamᵾl mbᵾ ndi, uⱡ kun kai mbᵾ, itᵾi nᵾk tᵾk kun etᵾng. Ei nga, akup tᵾn ndi, wamp mbᵾ tᵾp ou ndᵾmin. Ei nga, tᵾn nga wote, muⱡ kona ila Tipam ei ndi, ik nim ei mel, pep ropᵾn kont mbun muⱡmin. 10 Ya mᵾi kona ila, tᵾn nga tipamᵾl mbᵾ ndi, tᵾn ui onunga, etᵾk tᵾk rapᵾndᵾrmin. Wote, Got nga wamp tᵾpa rᵾpᵾndi uⱡ ila, tᵾn etpa kai mondrum. Ei tᵾn ndi, elim nga uⱡ wingti kun kai pol ila muⱡmin. 11 Got ndi, tᵾn mbun ngurum ui ni kᵾn, uⱡ mbᵾ ndi, tᵾn etpa enimp monduⱡnga, tᵾn numan kai mat pili napᵾtmᵾn. Wote, uⱡ mbun mbᵾ ndi, wamp namin mat, etpa elik rondrum mbᵾ, moⱡpa kundi uⱡ kun kai ti, wote kandᵾk ting.

Tᵾn Ronduⱡ Mbun Muⱡmin

12 Uⱡ ei mel etᵾk, enim nga kump ki mbᵾ, ndᵾiya nimba tem ndam, etᵾk ronduⱡ mondᵾk kongun itᵾi! 13 Nim nga kᵾmp raⱡ etkᵾn, kun mundkᵾn pana, mondpa pili ronduⱡ pi napᵾm wamp mbᵾ ndi, nim kandᵾk pep rong mbᵾ, ropa nit pendpa, uⱡ ti iti natᵾmba. Wote, ronduⱡ tᵾk muⱡing.

14 Enim ndi, wamp mbᵾ kᵾn pora, numan wang ndui uⱡ mbᵾ, ronduⱡ mundᵾk pep rok, mul uⱡ wingti mbila muⱡᵾi! Nambuⱡ emel, uⱡ wingti mbᵾ nga, iti natᵾm wamp ti, Nuim ei kᵾni nakᵾndᵾmba. 15 Enim pilik rᵾp etᵾk, kai mundᵾi! Tᵾpa kawa ndangga! Enim Got nga wamp poⱡ ti uⱡ wak ruing. Wote kongun kona ila, rᵾng kombila iti pepa, kongun kona etpa kit mondpa etᵾm ei mel, wamp ti, i iti nᵾtangga mon! 16 Wote, enim pilik kai itᵾi! Unt wu Iso uⱡ kit etpa, Got tᵾpa ou ndui nandpa, elim nga memp kai ei ᵾngᵾn ngumba, rᵾng tᵾpa nurum uⱡ ei mel, iti nᵾtᵾi mon! 17 Wote ni kᵾn, Iso mba, tipam nga memp kai ei ngui nitim ni, ngui ngᵾnggᵾrᵾm. Nambuⱡ emel, elim nga itim uⱡ ei nga, numan ropᵾl romba uⱡ ti, iti nᵾtᵾm ila, mindil tᵾpa ka ronduⱡ mundpa etpa andpa kurum.

Tᵾn Komnga Mong Saiyon Ila, Oⱡa Ombun Pora Ndurmᵾn

18 Un Isrel wamp mbᵾ etᵾng ei mel, enim komnga mong Sainai ila, nondpa ui nawᵾk mormin. Wamp kᵾⱡ ok kandrung ei, komnga Sainai ila, ndip ei nomba, rumbᵾⱡ mam ropa, kona tᵾma omba, etᵾm ei mel elinga, kandᵾk pilik etᵾng. 19 Wote, kona nila pikul ik nimba, wote ik ekit omba itim ei, wamp mbᵾ pᵾtᵾng. Wote wamp mbᵾ, ik mbᵾ pᵾtᵾng ei kᵾn, ronduⱡ mondᵾk, waldᵾk ik ei, pili nᵾpᵾtmᵾn mon nᵾtᵾng. 20 Nambuⱡ emel, wamp kᵾⱡ, ik kᵾⱡ piling ei nga mundmong etᵾng. Kng, owa, na ti, komnga mong ila oⱡa om ndam, ku ndi rop kundmin, nᵾtᵾng. 21 Uⱡ ni, wamp mbᵾ kandᵾk kᵾn, mundmong minal etᵾng. Wote Moses ndi, uⱡ ni kandpa, nimba mel,

“Na uⱡ ei kandᵾp, mundmong minal ent ku,” nᵾtᵾm.
22 Wote, enim kona ila, oⱡa ui nawᵾrmᵾn mon, ni ka! Enim komnga mong Saiyon ila nondpa ok, Got kont moⱡpa mint pi ei nga kᵾn, muⱡ kona peng ou Jerusalem ok kᵾn, anggelo minal mbᵾ kᵾn muⱡing. 23 Wote, enim mbᵾ kᵾn, mondpa pili wamp kat, wi muⱡ kona ila mbi moⱡnga, Got ndi, tᵾpa kang kumina mel randrum mᵾk rok, ambulk palk mormin kona ila ok mormᵾn. Ei nga, enim Got wamp kᵾmp ti, wu ei kᵾn ok, wote wamp kun kai mat muⱡnga orunga, etpa kun kai mondrum mbᵾ, mormᵾn kona ila nondpa ok mormᵾn. 24 Enim Jisas kᵾn oⱡina elim ndi, tᵾpa tenda etpa itim uⱡ ila elim nga mema ei ndi, tᵾn nga uⱡ kit mbᵾ wak rundrum. Wote, Eipel nga mema oi nitim ei ndi, punt ropa ti uⱡ ei, mepa urum.

Tᵾn Pilpᵾn Kungᵾndmᵾn

25 Akup enim pilik kun itᵾi! Got nga ik ninim ei, piling ei nga enimp kuⱡi nᵾtᵾi! Unt komnga Sainai ila, Got nga ik ronduⱡ mbᵾ, pili napᵾtᵾng wamp mbᵾ, nung nᵾk, pi naprᵾng mon! Ei nga, akup muⱡ kona ila, ik ei ndi, tᵾn kondpa nilinga pᵾnmin ei kᵾn, tᵾn nung nimbun mbin ei nga, nombuⱡa mam ti, ti natᵾmba. 26 Unt Got ndi, mᵾi mint ei, rowa nangga nilinga nitim,

“Akup tᵾn Got ndi, nimba mᵾi ropa kᵾn, akup mᵾi ei mendpᵾⱡ mon! Muⱡ ei kunda rowa nduimp,” nitim.
27 Got nga ik ninim ei ndi, tᵾn tᵾpa ora ndupa, kai etpa mel, elim nga mim itim mel mbᵾ ambuⱡpa, rowa ndupa, tᵾpa kun etmba. Ei nga, mel mat rowa ni nanim mbᵾ, elim tem kona ila temba. 28 Uⱡ ei nga, tᵾn Got ei kᵾn, angge namin! Ei nambuⱡ emel, tᵾn Got nga tᵾpa mumuk rui kona rowa rui narᵾmba ei, tᵾn ngumba. Ei nga, tᵾn akup, Got nga mbi paka rundmin ei nga, mundmong etpᵾn, numan kai pilpᵾn etamina, elim nga numan orunga wang nimba.

29 Nambuⱡ emel, tᵾn nga Got ei, ndip anmbil mel kapⱡa morum. Ei ndi, Got nga ik kum ti natᵾtmin wamp mbᵾ, ropa karᵾm.